ദുബായിലെ എന്റെ ഇപ്പോഴത്തെ ഏറ്റവും വലിയ പ്രശ്നം ഇവിടത്തെ ചൂടൊന്നുമല്ലാ, പിന്നെയോ ഹൈദ്രബാദി ദം ബിരിയാണിയാണ്. ഞങ്ങള് താമസിക്കുന്ന ഷെയറിങ്ങ് ഫ്ലാറ്റില് ഞങ്ങടെ തൊട്ടടുത്ത റൂമില് താമസിക്കുന്നത് ആന്ധ്രപ്രദേശിലെ ഹൈദ്രബാദില് നിന്നുള്ള ഒരു തെലുങ്ക് ഫാമിലിയാണ്. ഒരു ചേട്ടനും ചേച്ചിയും 10 വയസ്സുള്ള ഒരു മോളും. ആ ചേച്ചിക്ക് ഒരു പണിയുമില്ലാ, വെറുതെ ഇടക്കിടക്ക് മോളില് പറഞ്ഞ ബിരിയാണി ഉണ്ടാക്കി കൊണ്ടിരിക്കും, മനുഷ്യനെ കൊതി പിടിപ്പിക്കാന്. ഞങ്ങളുടേത് കോമണ് കിച്ചണാണ്, പോരാത്തതിന് കിച്ചണിന്റെ നേരെ ഓപോസിറ്റാണ് ഞങ്ങളുടെ റൂം. ചേച്ചി ബിരിയാണി ഉണ്ടാക്കി തുടങ്ങുമ്പോഴേക്കും ഫ്ലാറ്റിലാകെ അതിന്റെ കൊതിപ്പിക്കുന്ന മണം പരക്കും. ആ മണം കേട്ടാല് പിന്നെ എനിക്ക് ഇരിക്കപൊറുതിയുണ്ടാവില്ല. (വായില് വെള്ളം നിറഞ്ഞിട്ട് അന്നത്തെ ദിവസം വെള്ളം വരെ കുടിക്കണ്ടി വരില്ല). ഞാനുടനെ കിച്ചണിലേക്ക് പ്രവേശിച്ച് ചേച്ചിയുമായി കുശലപ്രശ്നങ്ങള് തുടങ്ങും “ഇന്ന് ബിരിയാണിയാ സ്പെഷല്, ചേച്ചി നല്ല എക്സ്പെര്ട്ടാണല്ലോ ബിരിയാണി ഉണ്ടാക്കാന്, ചേച്ചി ബിരിയാണി ഉണ്ടാക്കണ സ്മെല്ല് കേട്ടാല് കൊതിയാവും, എനിക്ക് ബിരിയാണി ഭയങ്കര ഇഷ്ട്മാണ് പക്ഷേ എനിക്ക് ശരിക്ക് ബിരിയാണി ഉണ്ടാക്കാനറിയില്ലാ“. ഇതൊക്കെ കേട്ടാല് ആ ചേച്ചി ഒരു വലിയ പാത്രം എടുത്ത് കഴുകി തുടച്ച് അതില് ഫുള്ള് ബിരിയാണി നിറച്ച് ‘ഇന്നാ അല്ഫോന്സക്കുട്ടീ, എന്റെ ബിരിയാണി കഴിച്ചു നോക്ക്, നിനക്ക് ബിരിയാണി നല്ല ഇഷ്ടമാണെന്നല്ലേ പറഞ്ഞത്“” എന്നു പറഞ്ഞ് എനിക്ക് തരേണ്ടതല്ലെ? അതല്ലേ അതിന്റെ ശരി, നിങ്ങളു തന്നെ പറ.
പക്ഷെ ഈ ചേച്ചിക്ക് നോ മാനേഴ്സ് . ഞാനിത്രക്കും ക്ലൂ കൊടുക്കുമ്പോ ഏതു പൊട്ടനും മനസ്സിലാവും ഇവളീ പറയണതൊക്കെ ബിരിയാണി കിട്ടാനാണെന്ന്. പക്ഷേ ഈ ചേച്ചി ഭയങ്കര നിഷ്കളങ്കയായി പോയി, മനുഷ്യമനസ്സുകളെ മനസ്സിലാക്കാനുള്ള സാമാന്യ മനശാസ്ത്രമോ, സൈക്കോളജിയോ ഒന്നും വശമില്ലാതെ പോയി. ഞങ്ങടെ ബോംബെയിലുള്ള വീട്ടില് അപ്പറത്തു താമസിക്കുന്ന പഞ്ചാബി ചേച്ചിയോട് ‘ഇന്ന് പാവ് ബാജിയാണോ ഉണ്ടാക്കിയത്, നല്ല മണം വരുന്നുണ്ടല്ലോ‘ എന്നൊരു വാക്കു പറഞ്ഞാല് മതി അഞ്ചു മിനുട്ടില് ഞങ്ങള്ക്കെല്ലാവര്ക്കും തിന്നാനുള്ള പാവ് ബാജി ചേച്ചി വീട്ടില് കൊണ്ടു വന്നു തരും. ഈ ചേച്ചി ബിരിയാണി ഉണ്ടാക്കി കഴിഞ്ഞ് അതും കൊണ്ട് ചേച്ചിയുടെ റൂമിലേക്ക് ഒറ്റ പോക്കാണ്. അപ്പോ എനിക്ക് സങ്കടം വരും എന്റെ അമ്മച്ചി ഉണ്ടാക്കണ ബിരിയാണി ഓര്മ്മ വരും. ഉടനെ ഞാന് ഫോണെടുത്ത് എന്റെ ചേട്ടായിക്ക് ഓഫീസ് വിട്ടു വരുമ്പോ വാങ്ങിച്ചു കൊണ്ടു വരാനായി ഒരു ബിരിയാണി പാഴ്സലിന് ഓര്ഡറ് കൊടുക്കും. അന്നട്ടും സമാധാനം കിട്ടിയില്ലെങ്കില് ഞങ്ങടെ താഴെയുള്ള ബേറൂട്ട് റെസ്റ്റോറന്റ്റില് പോയി ഒരു ചിക്കന് ഷവര്മ വാങ്ങിച്ചു തിന്നും.
എന്നാലും ഈ ചേച്ചിയെ അങ്ങനെ വിട്ടാല് പറ്റില്ലല്ലോ, അങ്ങനെയാണ് ഞാന് വേറൊരു ഐഡിയ പരീക്ഷിക്കാന് തീരുമാനിച്ചത്. ചേച്ചി ബിരിയാണി ഉണ്ടാക്കുന്ന ദിവസം ഞാനെന്തെങ്കിലും ഉണ്ടാക്കി ചേച്ചിക്ക് കൊടുത്തയക്കുക, അപ്പോ ചേച്ചി പാത്രം തിരിച്ചു തരുമ്പോ അതില് ബിരിയാണി ഇട്ടു തരും. എപ്പടി എന്റെ ഐഡിയ! പക്ഷേ ഏറ്റില്ലാ. ഞാന് റവ ലഡു ഉണ്ടാക്കി കൊടുത്തയച്ച് ബിരിയാണിക്കായി കാത്തിരുന്നു. ചേച്ചി ബിരിയാണിയൊക്കെ തിന്നു കഴിഞ്ഞ് പിറ്റേ ദിവസം ആ പാത്രത്തില് നാട്ടിലത്തെ ബന്ധു വന്നപ്പോ കൊണ്ടു വന്നതാണെന്ന് പറഞ്ഞ് എന്റെ പാത്രത്തില് അരി മുറുക്ക് തന്നു, എനിക്ക് തീരെ ഇഷ്ടമ്മില്ലാത്ത സാധനം. അടുത്ത പ്രാവശ്യം ഞാന് നാട്ടില് ചക്ക വരട്ടണതുപോലെ ദുബായിലെ ചക്കയായ ഈന്തപഴം വരട്ടി അലുവ പോലെയാക്കി അതിന്റെ മോളില് അണ്ടിപരിപ്പും ബദാമും വച്ച് അലങ്കരിച്ച് കൊടുത്തയച്ചു. പകരം കിട്ടിയത് മാമ്പഴം, ചേച്ചിയുടെ ആങ്ങള ദുബായ് മാര്ക്കറ്റിലാണത്രേ. അങ്ങനെ അതും പൊളിഞ്ഞു.
അപ്പോ എന്റെ കെട്ട്യോന് എന്നോടു ചോദിച്ചു നിനക്ക് ആ ചേച്ചിയോട് ബിരിയാണിയുടെ റെസിപ്പി ചോദിച്ച് അതു പോലെ ഉണ്ടാക്കികൂടെ എന്ന്. കാര്യം ശരിയാണ് അങ്ങനെ ചെയ്താല് മതി, പക്ഷേ വല്ലോരും വച്ചുണ്ടാക്കി സ്നേഹത്തോടെ തരുന്നത് കഴിക്കുമ്പോഴുള്ള സുഖം, തന്നെ വച്ചുണ്ടാക്കി കഴിക്കുമ്പോ കിട്ടില്ലാ. മാത്രമല്ലാ ഞാനുണ്ടാക്കിയാല് ബിരിയാണിക്ക് ആ ടേസ്റ്റ് കിട്ടുമെന്ന് യാതൊരു ഗാരണ്ടിയുമില്ലാ. എന്റെ പാചകത്തിന്റെ കാര്യം പറയാണെങ്കില് പാചകറാണിയായ എന്നെ നോക്കി എന്റെ ചേട്ടായി പറയും നിന്റെ സാമ്പാര് കഴിച്ച് ഞാന് ഒറിജിനല് സാമ്പാറിന്റെ ടേസ്റ്റ് തന്നെ മറന്നു പോയി എന്നു. ഓരോ പ്രാവശ്യം വക്കുമ്പോഴും എന്റെ സാമ്പാറിന് ഓരോ ടേസ്റ്റാവും. അത് ശരിക്കുമൊരു വലിയ കഴിവല്ലേ?, ഒരേ ചേരുവകള് ഉപയോഗിച്ച് ഓരോ പ്രാവശ്യം വ്യത്യസ്ത രീതിയില് സാമ്പാറ് തയ്യാറാക്കുന്നത്, എപ്പഴും ഒരേ സാമ്പാറ് കഴിച്ചാല് മടുക്കില്ലേ, പക്ഷേ ചുള്ളനത് മനസ്സിലാവില്ലാ. ചിലപ്പോ പുള്ളിക്കാരന് എന്നോട് ചോദിക്കും ഇത് സാമ്പാറാണോന്ന്, അപ്പോ ഞാന് സാമ്പാറിന്റെ പേര് മാറ്റി ഇത് ‘മിക്സഡ് വെജിറ്റബിള് കറി വിത്ത് പുളി‘ ആണെന്ന് പറയും, അപ്പോ മൂപ്പര്ക്ക് ഇത്തിരി സമാധാനം കിട്ടും. ഒരു പ്രാവശ്യം ഞാന് സാമ്പാറുണ്ടാക്കിയപ്പോ പുള്ളിക്കാരന് പറയാ നിന്റെ അവിയല് കൂട്ടാന് നന്നായിട്ടുണ്ടെന്ന്, അതു കേക്കുമ്പോ എന്റെ മുഖം ഇഡ്ഡ്ലിക്കരച്ച മാവു പോലെയും വട്ടേപ്പത്തിനു കലക്കി വച്ച മാവു പോലെയും വീര്ത്തു വീര്ത്തു വരും. അതിനു ശേഷം ഇന്ന് ഏതു കൂട്ടാനാ ഉണ്ടാക്കിയതെന്ന് ചോദിച്ചിട്ടേ പുള്ളിക്കാരന് നന്നായിട്ടുണ്ടെന്ന് പറയാറുള്ളൂ. സാമ്പാറിന്റെ കാര്യത്തില് മാത്രമേ പ്രശ്നമുള്ളൂ, നോണ്-വെജൊക്കെ ഞാന് അസ്സലായി വക്കും, ബിരിയാണി ഒഴിച്ച്!.
ഞാനുണ്ടാക്കുന്ന സാധനങ്ങളില് ചേച്ചിക്ക് ആകെ ഇത്തിരി ഇഷ്ടം തോന്നിയിട്ടുള്ളത് നമ്മുടെ പൂട്ടിനോടാണ്. അതു മാത്രം ചേച്ചി മുമ്പ് തിന്നിട്ടില്ലാന്ന് തോന്നണു. ഞാന് പൂട്ടും കുറ്റിയും പിടിച്ച് നിക്കുമ്പോ ചേച്ചിയുടെ വിചാരം ഞാനെന്തോ റോക്കറ്റ് വിക്ഷേപിക്കാന് പോവാണെന്നാണ്. ഇനി അടുത്ത പ്രാവശ്ശ്യം ചേച്ചി ബിരിയാണി ഉണ്ടാക്കുമ്പോ പൂട്ടുണ്ടാക്കി കൊടുത്തയച്ചാലോന്ന് വിചാരിച്ചു. പക്ഷേ ഒരു പ്രശ്നം പൂട്ട് കൊടുത്തയക്കുമ്പോ അതിന്റെ കൂടെ കടല കറി ഉണ്ടാക്കി കൊടുത്തയക്കണം, പിന്നെ പൂട്ടും കടലയും കൂട്ടി തിരുമ്മി എങ്ങനെയാ തിന്നാന്ന് പഠിപ്പിക്കണം. അതൊക്കെ വലിയ പാടാണ്. അതുകൊണ്ട് വളരെയധികം ചിന്തിച്ചതിനു ശേഷം ഞാനൊരു തീരുമാനത്തിലെത്തി. ഞാനീ സുവര്ണ്ണാവസരം നിങ്ങള്ക്കു വിട്ടു തരുന്നു. നിങ്ങളുടെ ബുന്ധി ഉപയോഗിച്ച് “ചേച്ചി ഇത്തിരി ബിരിയാണി തരോ” എന്ന് ഡയറക്റ്റായി ചോദിക്കാതെ തന്നെ ചേച്ചിയുടെ കയ്യീന്ന് ബിരിയാണി കിട്ടാനുള്ള സൂത്രം എഴുതി എനിക്കയച്ചു തരിക. ഏറ്റവും നല്ല ഐഡിയ അയക്കുന്ന ആള്ക്ക് സമ്മാനമായി ‘ഒടുക്കത്തെ ബുന്ധിമാന് അവാര്ഡും ശിലാഫലകവും‘ അയച്ചു തരുന്നതാണ്, മാത്രമല്ലാ ഞാനെപ്പോ ബിരിയാണി തിന്നുമ്പോഴും ആ ഭാഗ്യവാനെ സ്നേഹത്തോടെ സ്മരിക്കുന്നതാണ്. യു നോ, ഏന് ഐഡിയാ കാന് ചെയ്ഞ്ച് യുവര് ലൈഫ്, സോ ബി ഹറി, ഡോണ്ട് വേസ്റ്റ് ടൈം, യൂസ് യുവര് കുരുട്ട് ബുന്ധി.
ഇതൊക്കെയാണെങ്കിലും ആ ചേച്ചിയോട് എനിക്കും ആ ചേച്ചിക്ക് എന്നോടും ഭയങ്കര ഇഷ്ടമാണ്. ചോറും പാലുമൊക്കെ അടുപ്പത്തു വച്ച് റൂമില് വന്നിരുന്ന് ടി.വി. കാണുന്ന എന്നെ വാതിലില് മുട്ടി പാല് തിളക്കാറായെന്ന് ഓര്മ്മപ്പെടുത്തുന്നതും അരി തിളച്ചു പോവുമ്പോ എന്റെ ഗ്യാസ്സ്സ്റ്റൌ ഓഫാക്കുന്നതും ആ ചേച്ചിയാണ്. ഷെയറിങ്ങ് ഫ്ലാറ്റിനെ അതിന്റെ ശരിയായ മീനിങ്ങില് എനിക്ക് മനസ്സിലാക്കി തന്നത് ചേച്ചിയാണ്. ചേച്ചിയുടെ ഫെയറി (ഡിഷ് വാഷിങ്ങ് ലിക്വിഡ്) കഴിയുമ്പോ ചേച്ചി കൂളായിട്ട് അപ്പറത്തെ വീട്ടുകാരുടെ ഫെയറി എടുത്തുപയോഗിക്കും. ഒരു ദിവസം ചേച്ചിയുടെ ഗ്യാസ് കഴിഞ്ഞപ്പോള് അടുത്ത വീട്ടുകാരുടെ ഗ്യാസ് സ്റ്റൌവില് ചോറും കൂട്ടാനുമൊക്കെ ഉണ്ടാക്കി. ആ വീട്ടുകാരാണെങ്കില് വനാന്തരത്തില് കാണപ്പെടുന്ന അപൂര്വ്വ ഇനം ഔഷധചെടി എന്നൊക്കെ പറയണ പോലെ വല്ലപ്പോഴും ഒരു വെള്ളിയാഴ്ചയേ കിച്ചണിലേക്ക് വരികയുള്ളൂ. എന്നാലും അന്യന്റെ മൊതല് ഒരു ഒന്നര രണ്ടു ദിവസത്തില് കൂടുതല് ഉപയോഗിക്കില്ലാ എന്ന് ചേച്ചിക്ക് നിര്ബന്ധമുണ്ട്. പഞ്ചസാരയോ പച്ചമുളകോ കഴിഞ്ഞിരിക്കണ നേരത്ത് പെട്ടെന്ന് ആവശ്യം വന്നാല് ഉടനെ വെയിലത്ത് സൂപ്പര്മാര്ക്കറ്റില് പോയി വേടിക്കണ്ട ആവശ്ശ്യമില്ലാന്ന് ചേച്ചി എന്നോട് ഈ സാധനങ്ങള് ആവശ്യപ്പെട്ടപ്പോഴാണ് എനിക്ക് മനസ്സിലായത്.
ഷെയറിങ്ങ് ഫ്ലാറ്റിലെ ജീവിതം കൊണ്ട് എനിക്ക് വേറെയും ഗുണങ്ങളുണ്ടായി. എന്റെ ചേട്ടായി ഇപ്പോ എന്നെ ശബ്ദം കുറച്ചെ ചീത്ത പറയാറുള്ളൂ, അതും ഒഴിവാക്കാന് പറ്റാത്ത സന്ദര്ഭങ്ങളില് മാത്രം. എനിക്ക് ഇടക്കൊക്കെ പുള്ളിക്കാരന്റേന്ന് ഓരോ ഡോസ് കിട്ടിയിലെങ്കി ഭയങ്കര മനപ്രയാസമാണ്. പണ്ടൊക്കെ ഏതെങ്കിലും ടി.വി. പ്രോഗ്രാം കണ്ട് എനിക്ക് വട്ടിളകി ഞാന് ഡാന്സും പാട്ടുമൊക്കെ തുടങ്ങുമ്പോ കാണാന് പ്രേക്ഷകരുണ്ടാവില്ല, ചേട്ടായീം പിള്ളേരുമൊക്കെ ‘ദേ തൊടങ്ങി’ എന്നു പറഞ്ഞ് വേറെ മുറിയിലേക്ക് എണീറ്റ് പോകുകയാണ് പതിവ്. ഇപ്പോ ഞാനെന്റെ റിയാലിറ്റി ഷോ തുടങ്ങിയാല്, റൂം കുറെ വലിപ്പമുണ്ടെങ്കിലും ഒറ്റ റൂമായ കാരണം പോവാന് സ്ഥലമില്ലാ, അവിടെയിരുന്ന് എന്റെ കഴുതരാഗം ആസ്വദിക്കുകയേ നിവ്രുത്തിയുള്ളൂ. പിന്നെയൂള്ള ഒരു ഗുണം നമ്മുടെ മേല്പറഞ്ഞ ചേച്ചി ഉണ്ടാക്കുന്ന ഓരോ കൂട്ടാന്റെ മണം കേട്ടാല് നമ്മക്ക് കൂട്ടാനുണ്ടക്കണ്ട ആവശ്യമില്ലാ, ആ മണവും മൂക്കില് വലിച്ചു കേറ്റി പച്ച ചോറ് വാരിവലിച്ചുണ്ണാം, വേണങ്കി ഒരു മുട്ട പൊരിച്ചതും ഇത്തിരി മോരും ആവാം.
ഷെയറിങ്ങ് ഫ്ലാറ്റാണെങ്കിലും ഇവിടെ വാടകക്ക് വലിയ കുറവൊന്നുമില്ലാന്നു മാത്രമല്ലാ വളരെ കൂടുതലുമാണ്, റൂമിന്റെ വാടകയുടെ കാര്യം പറയുമ്പോള് ചേട്ടായീടെ മിഴികള് ഈറനണിയും, തൊണ്ട അടയും, ശബ്ദം ഇടറും. അപ്പോ ഞാന് ചേട്ടനെ എന്റെ മനോഹരമായ കുയില് നാദത്തില് ‘അപ്പഴും പറഞ്ഞില്ലേ പോരണ്ടാ പോരണ്ടാന്ന് ‘ എന്ന പാട്ടു പാടി ആശ്വസിപ്പിക്കും. ആ കഥ അടുത്ത ലക്കം.
Subscribe to:
Post Comments (Atom)
27 comments:
ആ ചേച്ചി ഒരു വലിയ പാത്രം എടുത്ത് കഴുകി തുടച്ച് അതില് ഫുള്ള് ബിരിയാണി നിറച്ച് ‘ഇന്നാ അല്ഫോന്സക്കുട്ടീ, എന്റെ ബിരിയാണി കഴിച്ചു നോക്ക്, നിനക്ക് ബിരിയാണി നല്ല ഇഷ്ടമാണെന്നല്ലേ പറഞ്ഞത്“” എന്നു പറഞ്ഞ് എനിക്ക് തരേണ്ടതല്ലെ? അതല്ലേ അതിന്റെ ശരി, നിങ്ങളു തന്നെ പറ.
അല്ഫോന്സകുട്ടി, ചുമ്മാ അങ്ങ് കേറി പറയ്, "ചേച്ചി ഒരു ദിവസം ഈ ബിരിയാണി ഉണ്ടാക്കാന് എന്നെ ഒന്നു പഠിപ്പിക്കണേ" ന്നു . എന്നിട്ട് ബിരിയാണിക്കാവശ്യോള്ള എല്ലാം വാങ്ങി ഒരു ഡേയില് ചേച്ചിയെ ഒന്നു കൂട്ട് വിളിക്കുക. ഇടക്കിട്ടെച്ചു ചേച്ചി പോവാതിരിക്കാന്,ചേച്ചി "എന്നാ പിന്നെ വരാം" ന്നു പറയാന് ഗ്യാപ് കൊടുക്കാതെ ഫുള് ടൈം കത്തി വയ്ക്കുക (അതോടെ ഓടി പോവുമെന്നോ . എന്നാ ഡോസ് അല്പം കൊറച്ചോ )
അതായതു ഫുള് ഇന്സ്ട്രക്ടഷന് ഫ്രം ചേച്ചി, അല്ഫോന്സകുട്ടി വില് ബി ജസ്റ്റ് എ റോബോട്ട്. അണ്ടെര്സ്റ്റാന്ഡ്?
(എന്താ ഷോര്ട്ട് കടിനു പകരം ഇത്രേം ലോങ്ങ് കട്ട് പറഞ്ഞെന്നോ. എന്റെ പൊന്നു അല്ഫോന്സകുട്ടി, ഇത്രക്കും വായിച്ചപ്പോഴേക്കും എങ്ങനേലും ആ ബിരിയാണി ഉണ്ടാക്കി തരനംന്നു എനിക്ക് പോലും തോന്നിപ്പോയി. വേറൊന്നും കൊണ്ടല്ല ഈ കൊതി കിട്ടാതിരിക്കാന്. അപ്പോള് ആ ചേച്ചി നിഷ് ആയതോണ്ടാല്ല ഇമ്മാതിരി അനങ്ങാകള്ളികളെ ഒത്തിരി കണ്ടതും കൊണ്ടതും ആയതു കൊണ്ടാവും ഓഫര് ചെയ്യതെന്നു ഊഹിക്കാനുള്ള കോമണ് സെന്സ് ഉണ്ടേ :p )
എന്തായാലും ആ ചേച്ചി ബിരിയാണി ഉണ്ടാക്കണ അന്ന് ഞങ്ങളെ ഒന്നു വിളിക്കണേ വീടിലേക്ക്. ഗ്രൂപ്പ് ആയി ചുമ്മാ ഒന്നു മുട്ടി നോക്കാം. മുട്ടുവിന് ... എന്നല്ലേ
"ഒരു പ്രാവശ്യം ഞാന് സാമ്പാറുണ്ടാക്കിയപ്പോ പുള്ളിക്കാരന് പറയാ നിന്റെ അവിയല് കൂട്ടാന് നന്നായിട്ടുണ്ടെന്ന്"
പാവം ചേട്ടന്. :)
മേലനങ്ങാതെ അങ്ങനെ അടുത്ത വീട്ടില് നിന്നും ഫുഡ് ചോദിച്ചു വാങ്ങാനുള്ള ഐഡിയ ഒന്നും എനിയ്ക്കറിയില്ല. അറിഞ്ഞിരുന്നേല് ഞാനത് പരീക്ഷിയ്ക്കില്ലായിരുന്നോ... ;)
സര്വാണി സദ്യക്കുണ്ടാക്കിയ സാംബാര്, ‘ദം’ ഇടാത്ത ബിരിയാണിയാക്കി നീളെ നീളെ സപ്ലൈ ചെയ്യുന്ന ‘അല്പൂ’, നമോവാകം!
-എന്നാലും ആ ചേച്ചിയെ സമ്മതിക്കണം, ട്ടോ!
ഇതാണീ ദുബായുടെ പ്രശ്നം..
അവിടെ ലോകത്തിലെ ഏറ്റവും വലിയ മാളുണ്ട്, ഹോട്ടലുണ്ട്, പാം ഐലന്റുണ്ട്, റോട്ടില് നിറച്ചും ഫെരാരിയും പോഷുമുണ്ട്..എന്നാലും സ്വന്തായി വെച്ചുണ്ടാക്കിക്കഴിക്കാന് ഒരു കിച്ചണ് ഇല്ല.
അതിനൊക്കെ ആഫ്രിക്ക. റോഡില്ല, വണ്ടിയില്ല, ലൈറ്റില്ല, കണ്ണാടി ബില്ഡിംഗുകളീല്ല..എന്നാലെന്താ...വാടക കുറവ്..വേലക്കാരികളെ കിട്ടാന് എത്ര എളുപ്പം...പിന്നെ കിച്ചണ്..എത്ര കിച്ചണ് വേണം?
പിന്നെ അല്ഫോണ്സേ, ഈ ദം ബിരിയാണി ദം ബിരിയാണി എന്നൊക്കെ പറച്ചിലേയുള്ളൂ ട്ടാ. മൂന്ന് കൊല്ലം ഞാന് ദം ബിരിയാണിയുടെ നാട്ടിലുണ്ടായിരുന്നു. പാരഡൈസ് ഹോട്ടല് തൊട്ട് ഒറീജിനല് ഹൈദ്രാബാദ് ദം ബിരിയാണി കഴിക്കാന് റ്റൂറിസ്റ്റുകളെ ഗൈഡുകള് കൊണ്ടു പോകുന്ന അഞ്ചാറ് ഹോട്ടലുകളില് വരെ ഞാനിത് പരീക്ഷിച്ചു...എനിക്കിഷ്ടപ്പെട്ടില്ല.
നമ്മടെ മലബാര് ബിരിയാണിയുടെ ഏഴയലത്ത് വരില്ല..മണവും ഗുണവും.
പുഴുങ്ങിയ ചിക്കന്, മസാലയും അത്ര പോരാ...മുട്ടയും ഇല്ല (വേണെങ്കില് ഇടാം)
അറ്റ് എനി റ്റൈം, മലബാറി ബിരിയാണിക്ക് വേണ്ടി ഞാന് ദമ്മിനെ കുരിതി സോറി കുതിര ...കുതിരി..ഹോ..കു-രു-തി കൊടുക്കും.
പിന്നെ ചോദിച്ച സ്ഥിതിക്ക് ദം കിട്ടാനുള്ള ഏക വഴി..എന് റ്റി ആറിന്റെ "ചൊട്ടസ്തീനാ വദീതമസ്താ" തുടങ്ങി പഴയ പുരാണ തെലുങ്ക് പടത്തിന്റെ സി ഡികള് കൊണ്ടു കൊടുക്കൂ..ദം ഹോം ഡെലിവറി വരും!
ചാത്തനേറ്: ഇത്തിരികൂടി വേവിച്ച് ഒരു പകുതി പായസ പരുവത്തില് ഒരു ബിരിയാണി ഉണ്ടാക്കി ഇതാ ഇത് ഞാന് ചേച്ചി ഉണ്ടാക്കുന്നതു നോക്കി പഠിച്ചതാ എന്നു പറഞ്ഞ് കൊണ്ട് കൊടുത്ത് നോക്ക്.. ചെലപ്പോ ഫലിക്കും.
ദം ബിരിയാണീന്റെ മണം വന്നിട്ട് ഇവിടെ ഇരിക്ക്പ്പൊറുതിയില്ലാതായി അല്ഫോന്സാമ്മേ. (പുതിയ സീരിയല് താങ്കളെക്കുറിച്ചാണോ?:))
ദുബൈ വിശേഷങ്ങള് ഇനിയും പോരട്ടെ.
-സുല്
നല്ലപോലെ കുറുകിയ കഞ്ഞിയുണ്ടാക്കി അതില് ഒരു കോഴിക്കാലും ഇട്ടു ചേച്ചിക്കു കൊടുത്തിട്ടു “ദേ ഇതാ കഞ്ഞി ബിരിയാണി, ഇതിന്റെ നാലയലത്തു വരുമോ നിങ്ങടെ ദം ബിരിയാണി..?” എന്നു ചോദീരു്. ചേച്ചിയല്ല ചേച്ചീടെ ചേച്ചി കൊണ്ടെത്തരും ബിരിയാണി.
ഒരു സംശയം ചോയ്ച്ചോട്ടേ..?
ചോറും പാലുമൊക്കെ അടുപ്പത്തു വച്ച് റൂമില് വന്നിരുന്ന് ടി.വി. കാണുന്ന എന്നെ ...
ഈ നൂറും പാലും പോലെ വല്ലോമാണോ ഈ ചോറും പാലും ....?
അറു ബോറ്.........
"ഏമണ്ടി..ചെപ്പണ്ടി..ഹൈദരാബാദ് ബിരിയാണിയലു തരലു" എന്നു തെലുങ്കില് പറയാത്തതാണ് ഈ കുഴപ്പങ്ങള്ക്കെല്ലാം കാരണം. ഇനി അതു ഫലിച്ചില്ലെങ്കില് ഇവിടെ സന്ദര്ശിക്കുക.
http://www.pachakam.com/recipe.asp?id=2773
ദുബായില് വാടക കൂടുതല് ആണെന്കിലും ജീവിക്കാന് സുഖം അവിടെത്തന്നെയാണ് .അതുകൊണ്ടല്ലേ ഞാന് ഇപ്പോഴും ഇവിടെ തന്നെ താമസിക്കുന്നത് .കരമ സെന്റെറിന്റെ എതിര്വശം .അല്ല അല്ഫോന്സ് ബിരിയാണി കഴിക്കണം എന്നാഗ്രഹം ഉള്ളപ്പോള് ചേട്ടനോട് പറയണം ലൂലൂ സെന്റെറില് പോയി വാങ്ങി വരാന് ( ഈ പെണ്ണുങ്ങള് ചില സമയം അങ്ങനെയാണ് ..വല്ലതും ഒക്കെ പെട്ടന്ന് കഴിക്കണം എന്ന് തോന്നും ).ഞാന് രാത്രി പന്ത്രണ്ടിന് മാസലടോശക്ക് ഓടിയതും ഒരു പെണ്ണ് കാരണം ആണേ .
"ഞാന് പൂട്ടും കുറ്റിയും പിടിച്ച് നിക്കുമ്പോ ചേച്ചിയുടെ വിചാരം ഞാനെന്തോ റോക്കറ്റ് വിക്ഷേപിക്കാന് പോവാണെന്നാണ്."
-അതു ന്യായം.
:)
(കൊതിമൂത്ത്, ബിരിയാണിയ്ക്കു പകരം 'മുളയാണി വച്ചവന് ചന്തു'...എന്ന മട്ടില് ഒന്നും പ്രയോഗിയ്ക്കല്ലേ..അല്ഫൂ... കുറച്ചുകൂടി ക്ഷമി. "ഒരുവേള പഴക്കമേറിയാല്....."ഒരുപക്ഷേ..)
പ്രിയ - ഐഡിയ കൊള്ളാം. ഒന്നു മുട്ടി നോക്കാല്ലേ. പോയാ ഒരു വാക്ക് കിട്ടിയാല് ഒരു ആന ബിരിയാണി എന്നല്ലേ പ്രമാണം.
ശ്രീ - അതു ശരി ഐഡിയ അറിയാത്തതിന്റെ കുഴപ്പമാണല്ലേ. സാരല്ല്യാട്ടോ, ഞാന് ക്ഷമിച്ചു.
കൈതമുള്ള് - തിരിച്ചും ഒരു നമോവാകം ഇരിക്കട്ടെ.
അരവിന്ദ് - “നമ്മടെ മലബാര് ബിരിയാണിയുടെ ഏഴയലത്ത് വരില്ല“ പറഞ്ഞത് നന്നായി, ഞാനേതായാലും ദം ബിരിയാണി സ്വയം പരീക്ഷിക്കാന് പോണില്ലാ. "ചൊട്ടസ്തീനാ വദീതമസ്താ" സി.ഡി. എവടെ കിട്ടും, ഇവടെ നയന്താരയുടെ സി.ഡി.യെ കിട്ടാനുള്ളൂ.
കുട്ടിചാത്തന് - ‘ചെലപ്പോ ഫലിക്കും‘ അല്ലാ ചെലപ്പോ അടിക്കും ചേച്ചി. ഐഡിയ തന്ന് ചതിക്കല്ലേ ചാത്താ.
സുല് - സീരിയല് വാഴ്ത്തപ്പെട്ട വിശുന്ധയായി പ്രഖ്യാപിക്കാന് പോകുന്ന അല്ഫോന്സാമ്മയെ പറ്റിയാട്ടോ.
തമനു - എന്താ ഒരു ഐഡിയ, തലയില് തൊപ്പി വച്ച് നടക്കണേ, അധികം വെയിലും കൊള്ളരുത്. “ഈ നൂറും പാലും പോലെ വല്ലോമാണോ ഈ ചോറും പാലും ....?“ അതാണ് പാല്കഞ്ഞി. ഇപ്പോ സംശയം മാറിയോ ആവോ.
ദീപു - താങ്ക് യൂ വെരി മച്ച്. ഞാനിതെന്താ ആരും ഇത്ര നാളായിട്ട് പറയാത്തെ എന്നു കരുതി വിഷമിച്ചിരിക്കായിരുന്നു. ഇപ്പോ സന്തോഷമായി.
ബൈജു - എമണ്ടന് ഐഡിയ തന്നതിന് നന്ദി. ഇനി ആ തെലുങ്ക് പറഞ്ഞു നോക്കട്ടെ, അതിന്റെ കുഴപ്പം കൊണ്ട് ബിരിയാണി കിട്ടാതിരിക്കണ്ട.
കാപ്പിലാന് - കരാമ സെന്റെറിന്റെ അടുത്താണോ താമസം. ഞാനിന്നലേം കൂടി അവടെ ചാച്ചൂസില് വന്നേ ഉള്ളൂ. രാത്രി പന്ത്രണ്ടിന് മസാലദോശക്ക് ഓടിച്ചതിന് സമ്മാനമായി ചേച്ചിക്ക് അവടന്ന് ഡ്രസ്സ് വാങ്ങിച്ചു കൊടുക്കണേ.
ചന്ദ്രകാന്തം - ഐഡിയക്കുള്ള ‘ഒടുക്കത്തെ ബുന്ധിമാന് അവാര്ഡ് ആന്ഡ് ശിലാഫലകം’ ചേച്ചി അടിച്ചുകൊണ്ടുപോകുന്ന ലക്ഷണമുണ്ട്.
അരവിന്ദ്,
മലബാര് ബിരിയാണിയെപ്പറ്റി ആ പറഞ്ഞതിനു താഴെ ഒരു ഒപ്പ്.
ഞാനും പല പല പേരുകേട്ട ഹൈദാരാബാദ് ബിരിയാണികളും കഴിച്ചു നോക്കിയിട്ടുണ്ടു ഒന്നും തലശ്ശേരി പാരീസ് ഹോട്ടലിലെ ബിരിയാണീയുടെ എഴയലത്തു കണ്ടിട്ടീല്ല.....
ഞങ്ങളുടെ കന്വിനിലെ ബോസ് ഒരു ഹൈദാരബാദ് ബിരിയാണീ ആരാധകന് ആയിരുന്നു, ഒരു പ്രാവശ്യം ഒരു മാഹിക്കാരി ചേച്ചീയെ കൊണ്ടു മലബാര് ബിരിയാണി വച്ചു കൊടുത്തു ഇപ്പം പുള്ളിക്കു എല്ലാ വീക്കും മലബാര് ബിരിയാണി കഴിക്കണം...ഹൈദാരാബാദ് ബിരിയാണി എന്നു കേള്ക്കുകയെ വേണ്ടാ.... പുള്ളിയുടെ സായീപ്പന് സുഹ്രൂത്തുക്കള് വന്നാല് ഇപ്പോള് മലബാര് ബിരിയാണിയാണു പ്രധാന വിഭവം :)
ദുബായ് വിശേഷങ്ങള് തകര്ക്കുന്നുട് . . ദൈറയിലാണ് ഷെയറിങ് ഫ്ലാറ്റിനു തലവെച്ച്ചത് എന്ന് കേട്ടപ്പോള് .... . ഹസ്സിനോട് നമ്മുടെ സിംപതീസ് അറിയിക്കുക. കൊടുക്കുന്ന വാടകയെക്കാളും മൂട്ടയും പാറ്റയും ഉണ്ടല്ലോ എന്ന സമാധാനത്തില് കഴിയുവാന് ഒരു ഉപദേശവും...
പോസ്റ്റ് കലക്കി. ഒരു എക്സ് ദുബായ് വാസി എന്ന നിലയില് പുതിയ ദുബായിവാസിക്ക് എല്ലാ ഭാവുകങ്ങളും...
എഴുത്ത് നിര്ബാധം തുടരട്ടെ
ആശംസകളോടെ
വിക്രമാദിത്യന്
ഗസബോ ട്രൈ ചെയ്തു നോക്കൂ അല്ഫോണ്സാക്കുട്ടി
“സാമ്പാറിന്റെ കാര്യത്തില് മാത്രമേ പ്രശ്നമുള്ളൂ, നോണ്-വെജൊക്കെ ഞാന് അസ്സലായി വക്കും, ബിരിയാണി ഒഴിച്ച്!“
അല്പൂ.. ഈ ബിരിയാണി ഒഴിച്ച് നോണ് വെജ് വെയ്ക്കണ വിദ്യ ഒന്ന് പോസ്റ്റണം. പരൂഷിയ്ക്കാനാ..
പിന്നെ, സാമ്പാറ് തമിഴ്നാട് സ്റ്റൈല് ആണെന്ന് കണവനോട് പറഞ്ഞാ മതി.(ഇവടെ പരിപ്പിട്ട് എന്ത് വെച്ചാലും അതിന് പേര് സാമ്പാറ്..)
ബിരിയാണീടെ ഒരു കാര്യം
ആ വ്യാകുല മാതാവിന്റെ മുഖമുള്ള അമ്മയിയമ്മ കൈയില് വിസയും, ട്ടിക്കറ്റും പിടിച്ചു നില്ക്കുന്നുണ്ട്. ഇപ്പോള് അല്ഫുവിനു എല്ലാ ട്ടൈപ്പ് ബിരിയാണി വെക്കാനുള്ള ദം കിട്ടും.
ഈ ബിരിയാണി പോസ്റ്റ് വായിച്ചിട്ട് എനിക്ക് കൊതിയാ വരുന്നത്....ഹൈദരബാദ് ബിരിയാണി ബിരിയാണികളില് വെച്ചേറ്റവും വല്യ സംഭവം ആണെന്നു കേട്ടിട്ടുണ്ട്...കുങ്കുമ പൂവൊക്കെ ഇട്ട് സുന്ദരിയായി നില്ക്കുന്ന ബിരിയാണിയല്ലേ ഇതു....കണ്മുന്പില് വെച്ച് കണ്ടിട്ട് അത് കഴിക്കാന് പറ്റാതെ നില്ക്കുകാന്ന് വെച്ചാല്....എന്താ ചെയ്യാ...ഒരു ഐഡിയയും കിട്ടുന്നില്ല...അല്ലെങ്കിലും ഇത്രേം നിഷ്കളങ്കയായവരോട് ഒരു ഐഡിയയും ഫലിക്കുമെന്നു തോന്നണില്ല....:)
ജിസോ - “ഒരു പ്രാവശ്യം ഒരു മാഹിക്കാരി ചേച്ചീയെ കൊണ്ടു മലബാര് ബിരിയാണി വച്ചു കൊടുത്തു“ എനിക്ക് മലബാര് ബിരിയാണി കിട്ടിയാലും മതി. നോ പ്രോബ്ലം.
ജിഹേഷ് - :)
വിക്രംസ് - ഭാവുകങ്ങള്ക്ക് നന്ദി
കണ്ണൂസ് - എന്തൂട്ടാ പറയണെ, ഒന്നൂടി ക്ലിയറായി പറഞ്ഞെ.
പൊറാടത്ത് - ഈ പൊറാടത്തിന്റെ ഒരു കാര്യം. ഒരു കാര്യം പറഞ്ഞാല് മനസ്സിലാവില്ലാ. ആ വിദ്യ അറിയണമെങ്കില് വല്ലപ്പോഴും അടുക്കളയില് കേറണം.
പ്രിയ - എന്താപ്പോ ബിരിയാണിക്കൊരു കൊഴപ്പം?
അന്നാമ്മ - കരിനാക്ക് വളച്ചൊന്നും പറയല്ലേ ചേച്ചിയെ, റിക്വസ്റ്റ്.
അപൂര്വ്വ റോസിന് - റോസാക്കുട്ടിക്ക് വിവരമുണ്ട്.“ഇത്രേം നിഷ്കളങ്കയായവരോട് ഒരു ഐഡിയയും ഫലിക്കുമെന്നു തോന്നണില്ല....:)“, ആ പറഞ്ഞതാണ് അതിന്റെ ശരി.
എന്റെ അല്ഫോന്സ ചേച്ചീ....ബിരിയാണി വിശേഷം കലക്കി...എന്റെ അയല്ക്കാരി..ചെയ്ത വിശേഷം കേള്ക്കണോ?ഇവിടെ എന്റെ സ്വന്തം അടുക്കള.യു നോ,ഇറ്റ് ഈസ് നോട്ട് എ ഷെയറിങ് വന്..എന്നിട്ട് പോലും,മൂപ്പതിയാര്( ഒരു പാവ ചൈനക്കാരി) എന്നോട് ബിരിയാണി ഉണ്ടാക്കാന് പഠിക്കണം എന്നും പറഞ്ഞു,ഞാന് പുത്തന് റിയാല് കൊടുത്തു വാങ്ങിച്ച ബസ്മതി റൈസ്,ചിക്കന്,നെയ്യ്..ഇത്യാതി സാധനങ്ങള് കൊണ്ടുണ്ടാക്കിയ എന്റെ സ്വന്തം ബിരിയാണി,ഉണ്ടാക്കുന്നത് കൂടെ നിന്നു കണ്ടു ....ഒന്നു ഹെല്പിയില്ലെന്നതോ പോട്ടെ....ഉണ്ടാക്കി ഇറക്കിയ ഉടനെ ഒരു പരന്ന പാത്രം - അതിന്റെ പേരു അറിയില്ല.നമ്മുടെ നാട്ടില് കുട്ടികളെ കുളിപ്പിക്കാന് എടുക്കുന്നത് കണ്ടിട്ടുണ്ട്.- അതില് നിറയെ കോരി ഇട്ടു കൊണ്ടുപോയി,മൂക്ക് മുട്ടെ വെട്ടിവിഴുങ്ങി.ആ ഹൃദയ ഭേദകമായ കാഴ്ച എനിക്ക് കാണേണ്ടി വന്നില്ല.
മൂപ്പര് ഫയങ്കര ബുദ്ധിമതിയായിരുന്നു. എന്റെ പാത്രം പോലും കടം വാങ്ങിയില്ല.എനിക്കൊന്നും തിരിച്ചു തരേണ്ടല്ലോ...?എങ്ങനെയുണ്ട്?അത്യാവശ്യ ഘട്ടങ്ങളില് ഇതൊന്നു പരീക്ഷിച്ചു നോക്കൂ.....അപ്പൊ എല്ലാം പറഞ്ഞതു പോലെ.
എന്നിട്ടും തന്നില്ലെന്കില്,നമ്മുക്ക് ഈ ബിരിയാണി ഉണ്ടാക്കല് പ്രക്രിയ തന്നെ സ്റ്റോപ്പ് ചെയ്യിക്കണം..നെയ്യിനു പകരം,ഡിഷ് വാഷ് ലിക്വിഡ ചേര്ത്തു കൊടുത്താല് മതി.പിന്നെ,കുറച്ചു നാളതെക്കെങ്കിലും ഈ പ്രക്രിയ നിര്ത്തി വച്ചേക്കും.
വഴി തെറ്റി വന്നതാ :D എന്തായാലും വന്നത് നഷ്ട്ടം ആയില്ല വെടികെട്ടു എന്തൊരു നിഷ്കളങ്കം അയ സ്റ്റൈല് നമിക്കാന് വേണ്ടും ഒരു ബ്ലോഗറെ കൂടെ കിട്ടി :D
ചേച്ചി..
ഒരു ദം ബിരിയാണിയുണ്ടാക്കി അവര്ക്കു കൊടുക്കൂ.. അപ്പോള് അവര് പറയും കുട്ടീ ഇങ്ങനെയല്ല ഉണ്ടാക്കുന്നത് ദാ ഇങ്ങിനെയാണ് എന്നു പറഞ്ഞ് ഉണ്ടാക്കിത്തരും ദം ബിരിയാണി..ഇതൊരു വിദ്യ
രണ്ടാമത്തെ വിദ്യ പറഞ്ഞു തരുന്നതിനു മുമ്പ് ആദ്യം ദം ബിരിയാണി എന്താണെന്നു പറയൂ..
അപ്പൊ ഈ ഹൈദരാബാദികള് ഇങ്ങനെയാ അല്ലെ?ഞങ്ങളുടെ പഴെ ഷയറിംഗ് റൂമിലെ ചെച്ചി ഉണ്ടാക്കിയ കട്ലെറ്റ് കണ്ട് കൊതി മൂത്ത ഞാനും ചേട്ടനും(സഹൊദരന് എന്നു വിവക്ഷ) അവറ്ക്കു ജിലേബി കൊടുത്തിട്ട് അതു തിന്നു താങ്ക്സും പറഞ്ഞു എന്നല്ലാതെ ഒന്നും നടന്നില്ല. എന്തായാലും കരാമ കാലിക്കട്ട് പാരഗണ് റ്റ്രൈ ചെയ്യൂ.നല്ല മലബാറ് ബിരിയാണി തിന്നാം....
അല്ഫോന്സക്കുട്ടിയുടെ ബിരിയാണി സ്റ്റോറി വായിച്ചിട്ട് ബിരിയാണി ഇഷ്ടമില്ലാത്ത എനിക്കുപോലൂം ബിരിയാണി തിനണം എന്ന് തോന്നുന്നു.
Post a Comment